પાટણના ફાટક વિસ્તારના રહીશો દ્વારા અંડરપાસની માંગ સાથે લોકસભાની ચૂંટણીનો બહિષ્કાર કરવાની ચિમકી

પાટણના ફાટક વિસ્તારના રહીશો દ્વારા અંડરપાસની માંગ સાથે લોકસભાની ચૂંટણીનો બહિષ્કાર કરવાની ચિમકી

પાટણના ખાલકશાપીર ફાટક નં. 42 Cને અગાઉ બંધ કરવાના રેલવે વિભાગના નિર્ણયને લઈ આ વિસ્તારમાં આવેલી વિવિધ સોસાયટી વિસ્તારના રહીશો દ્વારા ફાટક માર્ગ પર અંડરપાસ બનાવવાની માગ સાથે દેખાવો કર્યો હતો. જે વાતને આજે ધણો સમય વિતવા છતાં કોઇ જ પ્રકારની કાર્યવાહી હાથ નહીં ધરાતા રવિવારે પુનઃ આ વિસ્તારના લોકો એ રેલી સાથે સુત્રોચ્ચાર કરી અંડરપાસ બનાવવા ત્વરિત કાર્યવાહી હાથ ધરવાની માગ કરી આગામી લોકસભાની ચૂંટણીનો બહિષ્કાર કરવાની ચિમકી ઉચ્ચારી હતી.

આ બાબતે મળતી હકીકત મુજબ પાટણ શહેરના ખાલકશાપીર વિસ્તારમાં આવેલા રેલ્વે ફાટક 42 C ને અગાઉ બંધ કરવાની રેલવે તંત્ર દ્વારા હાથ ધરવામાં આવેલ ગતિવિધિને લઈ આ વિસ્તારમાં આવેલ વિવિધ સોસાયટી વિસ્તારના અંદાજીત 5000 થી વધુ લોકોને તેમજ આ વિસ્તારમાં આવેલા ખેતરોના માલિકોને ત્રણ કિલોમીટર ફરીને જવાની નૌબત ઉભી થતાં ફાટક મામલે વિસ્તારના લોકો એ ઉગ્ર રજૂઆત કરી આ રેલવે ફાટક ને બંધ કરતાં પહેલાં ફાટક નીચે થી અંડરપાસ ની સુવિધા ઉપલબ્ધ બનાવવા માગ કરતાં રેલવે સતાધીશો દ્વારા અંડરપાસ માટે મંજૂરી આપવામાં આવી હતી. પરંતુ જિલ્લા કલેકટર દ્વારા આ મામલે આજદિન સુધી કોઈ પણ પ્રકારનો હકારાત્મક અભિગમ નહિ અપનાવતાં રવિવારે પુનઃ ઉપરોક્ત સોસાયટી વિસ્તારના અબાલ વૃધ્ધ સૌ કોઇ એ એકત્ર થઈ બેનર સાથે રેલી યોજી સુત્રોચ્ચાર કરી ફાટક નીચેના અંડરપાસની માગ સત્વરે સંતોષવામાં આવે તેવી માગ કરી હતી.

જો આ માગ તાત્કાલિક ધોરણે પૂર્ણ કરવામાં નહિ આવે તો વિસ્તારના લોકો એ આગામી લોકસભાની ચૂંટણીનો બહિષ્કાર કરી ભાજપ, કોગ્રેસ કે અને પાર્ટીના ઉમેદવારોએ આ વિસ્તારમાં મત માંગવા આવવું નહીં તેવી ચિમકી ઉચ્ચારતા રવિવારનો રજા દિવસ આ વિસ્તારમાં ટોક ઓફ ધ ટાઉન બન્યો હતો.